Budget thara Mizoram share of taxes san chhan tu sawi nge dik zawk

by News Editor

Tualchhung News

ZORAM TODAY| 3rd February, 2026: Nikhat kalta khan Adviser to CM (Finance), TBC Lalvenchhunga chuan a facebook page ah thu post a nei a, social media ah chai zui a hlawh leh hle, chu chu budget thara Mizoram share of taxes san chhan TBC Lalvenchhunga sawi a ni. MZU zirtirtu Prof. James LT Thanga chuan a rawn chhang let ve nghal zat a, a ngaihnawm hle.

TBC Lalvenchhunga thu post chu.. “16th Finance Commission zet chu...

Chief Minister Pu Lalduhoma kaihhruaina hnuaiah Finance Department in theih tawp an chhuah a. Memorandum thehlut tur pawhin meeting leh presentation enge maw zat neih a ni a. A bîk takin a hmunah Pu Lalhmingmawia Sailo MF&AS Addl Secy kaihhruaina hnuaia an thawhrim rah a tih loh theih loh bawk a. 16th FC Team in min rawn tlawh khan Member Ms Annie George Mathew kha kan Chief Secretary kalchhuak ta Pi Renu Sharma IAS batch mate a lo ni kher bawk nen, Annie hi a rawn call deuh reng bawk a. A thawhhlawk hle in ka hre bawk a ni. An rawn kal hnuah CM hian Delhi lamah a bawhzui reng bawk a. Mizoram an rawn thlenin kan Minister Dr. Vanlalthlana nen kan lo hmuak a.

Chairman Dr Arvind Panagariya lehkhabu Why Growth Matters bakah India : Emerging Giants kha kan Minister hian a lo titi pui bawk a. Flight pahnih ah an lo kal avangin darkar khat zet Airport Lounge ah titi na hun kan neih phah te kha ka ṭum khat tawnna leh tawnhriat belhchhahtu an ni.

Tun 16th FC a Horizontal Devolution ah FC hmasa aiin 0.064% (0.564%)lawih in a han pung hi a lawmawm em em a. Vbc nuai 15 velah chuan tán tham tak a ni. Kan chhehvel state te zawk ho te kan tluk thuak bakah Nagaland kan khum thei a, Department a rim taka thawktu te hnenah lawmthu ka sawi tak zet a ni.” a ti.

He a thu post hi mi chi hrang hrangin an comment a. Comment tu zingah Mizoram University-a Economics zirtirtu Prof. James LT Thanga chuan TBC Lalvenchhunga thu post- Mizoram tax devolution san chhan chu ‘heti vang zawk hian a lawm,’ tih ni thei tur angin thu a ziak.

Prof. James LT Thanga chuan, “16th Finance Commission hian parameter thar “Contribution to GDP” a rawn dah a.. hei hi 10% weigh pek ani a.. hemi chawh chhuah nan hian 2018 atanga 2023 thleng, kum 5 chhung (covid kum paihin) a kan nominal GSDP chawhrual hi a rawn hmang a.. khatih hunlaia kan state GSDP kha a hniamlo hle a.. opposition lam atang te, tuna kan sorkar hotu ni ta te ngei pawh telin, keimah ngei pawh hian kan GSDP estimate sang ltk kha zialo, a dik tawklo ang.. borrowing space neih tam tum vanga inflate ani lo maw etc tih khan kan sawi ve thin kha ania..

Kha ta GSDP lo sang ngei mai khan kan state share hi a rawn up in a lang ta tlat mai a.. a lawmawm letling ta viau mai.. parameter dangte erawh a hmasa lam ami te ten khan a in zul a.. contribution to gdp hian min rawn reward ta niin a lang,” a ti a.

“Palova kha Chhuanvawra alo ni ta” an tih te pawh min ti hrechhuak e, tiin fiamthu in a tlip nghal bawk.

Prof. James LT Thanga comment hi TBC Lalvenchhunga hian a chhang let zauh na a, hmuh zui theih turin a awm lo thung.